नेपाल कम्युनिष्ट पार्टी (मसाल)
केन्द्रीय कार्यालय
Email : ncpmashal@gmail.com

वक्तव्य

संविधान दिवसको उपलक्ष्यमा नेकपा (मसाल) ले संविधानको कार्यान्वयनको पक्षमा विशेष जोड दिन्छ ।
संविधानको कार्यान्वयनको पक्ष अहिले गम्भीर राष्ट्रिय महत्वको विषय भएको छ । भारतीय विस्तारवादले संविधान जारी भएको लगत्तैपछिदेखि नै त्यसमा संशोधनका लागि जोड दिँदै आएको छ र त्यही उद्देश्य पुरा गर्नका लागि त्यसले नेपाल विरुद्ध नाकाबन्दी लगाउने समेत काम गर्‍यो । भारतीय विस्तारवादको पृष्ठपोषणमा मधेशवादीहरूले संविधानलाई चिरा चिरा पारेर हत्या गर्ने प्रयत्न गरी रहेका छन् । त्यस प्रकारको पृष्ठभूमिमा संविधानको कार्यान्वयनको पक्ष ऐतिहासिक राष्ट्रिय महत्वको विषय बन्न गएको छ । अहिले वास्तवमा संविधानमाथि विभिन्न कोणबाट भई रहेको आक्रमणका कारणले देशको राष्ट्रियता, सार्वभौमिकता र अखण्डता तथा गणतन्त्र र धर्म निरपेक्षता समेत गम्भीर सङ्कटको स्थिति उत्पन्न भएको छ । त्यही उद्देश्य पुरा गर्न नै त्यसले सत्ता परिवर्तन गरेर नयाँ सरकारको गठन गरेको छ । त्यो सरकारलाई आफ्ना विस्तारवादी र कट्टर हिन्दूवादी उद्देश्यहरू पुरा गर्नका लागि पुरा दबाब दिने छ ।
उपर्युक्त पृष्ठभूमिमा नेपालको राष्ट्रियता, सार्वभौमिकता, अखण्डता तथा गणतन्त्र र धर्म निरपेक्षता समेतको रक्षाका लागि उच्च प्रकारको सतर्कता अपनाउन र व्यापक ऐक्यबद्धता कायम गर्नका लागि नेकपा (मसाल) ले सम्पूर्ण नेपाली जनतासित अपिल गर्दछ ।

मिति ः २०७३ असोज २ गते

मोहनविक्रम सिंह
महामन्त्री