तीजको अवसरमा युएईमा रक्तिमको रमाइलो

   तीजको अवसरमा युएईमा रक्तिमको रमाइलो

                                               

उमाकान्त पाण्डे/उज्यालो 

 उडी हिँड्ने बादल जस्तै मेरो जीवन कथा, जता लान्छ हुरीले जान्छु त्यतै त्यता ।

कहिले कालीको बगरमा त कहिले कतारको खाडीमा, कहिले कर्णाली बचाउँ भन्दै त कहिले राष्ट्रियता बचाउन । सांगीतिक प्रस्तुती मार्फत जन आव्हान गर्दै हिँड्ने गायक जीवन शर्मा शुक्रबारका दिन यसो भन्दै आफ्नो यात्राबारे उपस्थितलाई जानकारी गराउँदै हुनुहुन्थ्यो । 

दर्शकले पनि थपिदिए, 

बादल त उड्छ, डुल्छ घुम्दै आकाश चारघेरा भरी 
जहाँ जहाँ जानुस् बस्ने त उही जनताकै मनभरी ।

दर्शकको बाक्लो उपस्थिती रहेको सभाहल भित्र जब रक्तिमका कलाकार प्रवेश गरे, लाग्थो, हामी दुई हप्ता अघि राजधानीमा रक्तिमले आयोजना गरेको कर्णाली बचाउँ अभियानमै छौं । गायक शर्माले श्रम बेच्न विदेशिएका नेपाली माझ फेरी उस्तै शब्द गुन्जाए ।   

छैन मेरो शरीरमा अत्तरको सुगन्ध 
होला बरु जिउभरी पसिनाको गन्ध 
होलान मेरा खुट्टाहरु भतभती फुटेको
तर मेरो जिन्दगी यसैमा उठेको । 

उपस्थित दर्शकको गडगडाहट ताली लगाए ।  जनताको पक्षमा शासक वर्गको विरोध गर्दै आफ्ना भाका गुन्जाउने शर्माले फेरी गीति भाकाले नेताहरुलाई व्यंग्य गर्नुभयो । 

कालो धन थुपारेर ढल्की हिंड्नु भन्दा 
हलो जोत्नु गिट्टी कुट्नु होला राम्रो धन्दा 

होला बरु झुपडीमा भोकै बस्नु राम्रो 
बितोस बरु जिन्दगी पसिनामै हाम्रो ।  

शर्माले आफ्ना चर्चित भाकाहरु सिमली छाँयामा बसी, कोही साथी सागर पारीलगायत आधादर्जन गीत गाउनुभयो । उहाँले गाएका गीतहरुमा दर्शकले उठेर नाचेर सहयोग गरेका थिए ।  नेपालबाट आएको रक्तिम कलाकारको टोलीले सीमा पारी, मिनी ओपेरा प्रस्तुत गर्दा उपस्थित दर्शकका आँखा रसाएका थिए ।

घरको छानो चुहिएर ओत लाग्ने ठाउँ नभएको बेदनाको पोको परदेशिएको परिवारको सदस्यलाई पुराएको अभिनय प्रस्तुत गर्दा दर्शकका आँखा रसाएका हुन । रक्तिमका केन्द्रीय सल्लाहकार तथा प्रगतिशिल पत्रकार संघका अध्यक्ष नारायण शर्मा, रक्तिमका केन्द्रिय कलाकार सुमन रोकामगर र ज्योती फौजामगरले अभिनय गरेका थिए । सुमन र ज्योति मगरका अलग अलग नृत्यलाई धेरै दर्शकले रुचाएका थिए । जनबादी तीज गीतको नृत्यले उपस्थित दर्शकलाई जुरुक्कै उठाएको थियो । 

युएईमै रहेर लामो समय यता रक्तिम अभियानमा होमिएका कलाकार रक्तिम युएईका अध्यक्ष डम्बर भण्डारी, कोषाध्यक्ष सीता श्रीष, चुमान काउचा मगर, बसन्त थापा, करण कुँवरलगायतले प्रस्तुती देखाएका थिए । अध्यक्ष डम्बर भण्डारी र सीता श्रीषले प्रस्तुत गरेको गीति नाटकले दर्शकलाई भावुक बनाएको थियो । 

यो सबै व्यवस्थापन युएई नेपाली एकता समाजले प्रगतीशिल तीज विशेष कार्यक्रमको अवसर पारेर मिलाएको थियो । नेपालबाट आएका रक्तिम कलाकारहरुको प्रमुख आतिथ्यता, नेपाली दूतावासका तृतीय सचिव पदम राज बोगटीको विशेष आतिथ्यता, विभिन्न संघसस्थाका प्रतिनिधि, व्यवसायीहरु र झन्डै ६ सय नेपाली कार्यक्रममा उपस्थित थिए ।